पुणे (शशिकांत पाटोळे) | दि; ९ मार्च २०२६ : बोपोडी येथील डॉ. राधाकृष्ण सर्वपल्ली प्रशाला हायस्कूलमध्ये गेल्या तीन वर्षांपासून प्रलंबित असलेल्या दुरुस्तीच्या कामांना अखेर प्रशासकीय स्तरावर मुहूर्त मिळाला आहे. शाळेच्या दुरवस्थेबाबत सातत्याने करण्यात आलेल्या पाठपुराव्यामुळे हे काम सुरू झाले असून, यामुळे विद्यार्थ्यांचा सुरक्षित शिक्षणाचा मार्ग मोकळा झाला आहे.
या शाळेच्या इमारतीची अवस्था बिकट झाली होती, ज्याबाबत औंध क्षेत्रीय कार्यालयाचे सहाय्यक आयुक्त, पुणे महानगरपालिका आयुक्त आणि रचना भवन येथील संबंधित अधिकाऱ्यांकडे वारंवार निवेदने देऊन दुरुस्तीची मागणी करण्यात आली होती. शाळेचे छत आणि भिंतींच्या दुरुस्ती अभावी विद्यार्थ्यांना शैक्षणिक कामकाज करताना अडचणी येत होत्या.
• शाळा व्यवस्थापन समितीकडून पाहणी..
सध्या सुरू असलेल्या या कामांची प्रत्यक्ष पाहणी स्वाभिमानी रिपब्लिकन पक्ष 'युथ रिपब्लिकन'चे पुणे शहर जिल्हाध्यक्ष तथा शाळा व्यवस्थापन समितीचे अध्यक्ष जीवन घोंगडे यांनी केली. यावेळी त्यांनी कामाच्या दर्जाचा आढावा घेतला.
"शाळेच्या इमारतीची आणि छताची दुरुस्ती अत्यंत आवश्यक होती. वारंवार केलेल्या पाठपुराव्याला यश आले असून, आता विद्यार्थ्यांना सुरक्षित आणि दर्जेदार शैक्षणिक वातावरण उपलब्ध होणार आहे. शाळेच्या सर्वांगीण विकासासाठी आम्ही कटिबद्ध आहोत."
— जीवन घोंगडे (अध्यक्ष, शाळा व्यवस्थापन समिती)
• पालकांकडून समाधान....
शाळेचे रूप पालटत असल्याचे पाहून स्थानिक नागरिक आणि पालकांनी समाधान व्यक्त केले आहे. सरकारी शाळांच्या सक्षमीकरणासाठी प्रशासनाने भविष्यातही अशाच प्रकारे तत्परता दाखवावी, अशी अपेक्षा पालकांनी व्यक्त केली आहे. या दुरुस्तीमुळे पावसाळ्यात होणारी छताची गळती आणि इमारतीचा धोका टळणार आहे.
: ठळक मुद्दे :
• प्रलंबित प्रश्न : ३ वर्षांपासून दुरुस्तीचे काम रखडले होते.
• दुरुस्तीचे स्वरूप : इमारतीचे बळकटीकरण आणि छताचे काम सुरू.
• यश : पालिका प्रशासन आणि क्षेत्रीय कार्यालयाकडे केलेल्या निवेदनांना यश.
• उद्देश : विद्यार्थ्यांना सुरक्षित व चांगले शैक्षणिक वातावरण मिळवून देणे
0 Comments