मावळ लोकसभा मतदारसंघाअंतर्गत असलेल्या पनवेल विधानसभा कार्यक्षेत्रात भारत निवडणूक आयोगाच्या मार्गदर्शक सुचनांप्रमाणे मावळ लोकसभा मतदारसंघाचे निवडणूक निर्णय अधिकारी दीपक सिंगला यांच्या मार्गदर्शनाखाली आणि पनवेल विधानसभा मतदारसंघाचे सहाय्यक निवडणूक निर्णय अधिकारी राहुल मुंडके यांच्या अधिपत्याखाली गृहमतदान प्रक्रिया संपन्न झाली. याकरिता बुथ स्तरीय अधिकाऱ्यांमार्फत घरोघरी सर्वेक्षण करून इच्छुक मतदारांकडून १२ ड अर्ज भरण्यात आले होते. या अर्जांची छाननी करून दिव्यांगांसह ८५ वर्षे वयावरील पात्र मतदारांसाठी टपाली मतपत्रिका तयार करण्यात आल्या होत्या. त्यानंतर गृहमतदान प्रक्रिया राबविण्यासाठी या मतदारांच्या प्रत्यक्ष घरी जाऊन टपाली गृहमतदान प्रक्रिया सुरळीत पार पाडण्यात आली. याकरिता स्वतंत्र पथकांची नियुक्ती करण्यात आली होती. या पथकामध्ये सेक्टर ऑफिसर, पर्यवेक्षक, केंद्राध्यक्ष, मतदान अधिकारी, पोलिस अधिकारी कर्मचारी, सुक्ष्म निरीक्षक, बीएलओ, व्हिडीओग्राफर यांचा समावेश होता. या गृहमतदानासाठी वेळापत्रक तयार करण्यात आले होते. त्यानुसार पथकातील नियुक्त अधिकारी कर्मचाऱ्यांनी विहीत कालावधी आणि वेळेत ही प्रक्रिया पार पाडली. गृहमतदानाबाबतची पुर्वकल्पना संबधित मतदार यांना लेखी स्वरूपात देण्यात आली होती. भारत निवडणूक आयोगाने दिलेल्या मार्गदर्शक सूचनांचे गृहमतदान प्रक्रियेवेळी काटेकोरपणे पालन करून प्रक्रिया पार पडली. मावळ लोकसभा मतदारसंघातील उर्वरित विधानसभा मतदारसंघात देखील अशा प्रकारे गृहमतदान प्रक्रिया नियोजित वेळापत्रकानुसार पार पाडली जाणार असल्याचे निवडणूक निर्णय अधिकारी दीपक सिंगला यांनी यावेळी सांगितले.
0 Comments