अखेर ८ दिवसानंतर ॲस्ट्रासिटीचा गुन्हा दाखल;पोलीस अधीक्षक नंदूरबार यांच्या निर्देशानुसारनंतर गुन्हा दाखल..

 

• पिंपर्डे येथील आदिवासी व्यक्तीस जातीवाचक अश्लील शिवीगाळ करून गंभीर मारहाण प्रकरणात पोलीस निरीक्षकांविरोधातही तक्रार

     शहादा प्रतिनिधी: शहादा तालुक्यातील पिंपर्डे  येथील कृष्णा भगवान वाघ या आदिवासी व्यक्तीस २८ मार्च २०२५ रोजी  त्याच गांवातील अमोल हिरालाल कात्रे,जितेंद्र भबुतराव कात्रे,जयू जितेंद्र कात्रे,उज्वलाबाई हिरालाल कात्रे, मनिषा जितेंद्र कात्रे,अन्नपूर्णाबाई भबूतराव कात्रे या मराठा समाजाच्या ६ लोकांनी जातीवाचक अश्लील शिवीगाळ करीत पाईपने जबर मारहाण केली होती.त्यानंतर शहादा पोलीस ठाण्यातील पोलीस निरीक्षक निलेश देसले यांनी ज्याला मारहाण झाली आहे,त्याला अश्लील शिवीगाळ करीत पुन्हा मारहाण करून अशा फिर्यादी आदिवासी व्यक्तीलाच पोलीस ठाण्यात डांबून ठेवले होते.दुस-या दिवशी २९ मार्च २०२५ रोजी  कृष्णा वाघ यांचे सरकारी रूग्णालय शहादा येथे औषधोपचार झाल्यानंतर पोलीस ठाणे शहादा येथे तक्रार दाखल करायला गेले असता पुन्हा त्यास अश्लील शिवीगाळ करून लाॅकअपमध्ये बंद करायला लावले.

                      आदिवासी फिर्यादी कृष्णा वाघची तक्रार घेणार नाही,आदिवासी महिलांची तक्रार घेत नाही,तुम्हाला काय करायचे ते करून घ्या,बाईला बोलवून तुमच्यावरच ३५४ चा  गुन्हा दाखल करतो अशी धमकी सामाजिक कार्यकर्ते तथा बिरसा फायटर्सचे राष्ट्रीय अध्यक्ष सुशिलकुमार पावरा यांना पोलीस निरीक्षक निलेश देसले यांनी दिली होती. म्हणून उपविभागीय पोलीस अधिकारी शहादा येथे २९ मार्च २०२५ रोजी  व पोलीस अधीक्षक नंदूरबार यांचेकडे १ एप्रिल २०२५ रोजी आदिवासी संघटनांमार्फत पोलीस निरीक्षक निलेश देसलेंविरूद्ध तक्रारी निवेदन देण्यात आले.त्यानंतर अपर पोलीस अधीक्षक आशीष कांबळे यांनी ४ एप्रिल २०२५ रोजी तक्रारी अर्जाची चौकशी केली असता आदिवासी व्यक्तींची तक्रार दाखल करण्यात आली नाही,हे लक्षात आल्यानंतर निलेश देसले पोलीस निरीक्षक यांना आदिवासी व्यक्तींची तक्रार दाखल करून घेण्यास फोनवर निर्देश दिले. अखेर पोलीस अधीक्षक नंदूरबार यांच्या भेटीनंतर पिंपर्डे येथील आदिवासी व्यक्तीस जातीवाचक अश्लील शिवीगाळ करून मारहाण प्रकरणात ८ दिवसानंतर ४ एप्रिल २०२५ रोजी ॲस्ट्रासिटीचा व अन्य गुन्हे नोंद करण्यात आले.यात आरोपीविरुद्ध भारतीय न्याय संहिता २०२३ कलम ११८(१),१२५ अ,२९६,१८९(२),१९० व अनुसूचित जाती आणि अनुसूचित जमाती अत्याचार प्रतिबंधक अधिनियम १९८९ अन्वये कलम ३(१) आर,३(१) एस,३(२) वी ए अनुसार गुन्हे दाखल करण्यात आले आहेत. 

          लीलाबाई कृष्णा वाघ यांस अश्लील जातीवाचक शिवीगाळ करून धमकी दिली व विमलाबाई मोतीराम वाघ तसेच गांवातील सरपंच कस्तूरीब़ाई शामराव चौधरी व इतर लोकांवर गर्दीचा फायदा घेत अन्नपूर्णाबाई कात्रे यांनी मिरची पूड अंगावर फेकली.म्हणून जातीवाचक अश्लील शिवीगाळ करून पाईपने मारहाण करणा-या  मराठा समाजाच्या ६ लोकांविरूद्ध कृष्णा वाघ यांनी फिर्याद दिली आहे.प्रकरणाची चौकशी दत्ता पवार उपविभागीय पोलीस अधिकारी शहादा हे करीत आहेत. आरोपींना अटक करण्याची मागणी जोर धरू लागली आहे.